هارون حکیمی
ستا د زندان تصویر زه ښه وینمه
پښې دي تقدیر په زولنو تړلي
لاس په نکریزو د سرسخته فرهنګ
ژبه دي ټکی تر پښتو نه اوړي
د سترګو هر نظر حیا ګرځوې
خو زړه دي لیري له دې ټولو پولو
پر یو عجیب ارمان دی ځان تړلی!
ستا د زندان تصویر زه ښه وینمه
ته چي سا اخلې هم یو نوم یادوې
د هرې سا په کښلو درد تېروې
د لیري والي داغ دي زړه اوبوي
له پستو شونډو دي موسکا تللې ده
په خوب او ویښه دي هېر کړی دی ځان
خو تر ارمانه رسېدلای نه سې..
ستا د زندان تصویر زه ښه وینمه
زه مي له خپله حاله تا حسوم
ماته هم دومره موانع ولاړ دي
زه هم د ټولو بوج ستومانه وړمه
ماته حیا د ارمانو قاتله
ماته حیا د ارمانو هدیره
یواځي دا لیکي ددې هدیرې
د قبرو شناختي دي چي باد یې وهي
(هلک مین سي وطن پرېږدي
نجلۍ مینه سي مخ پټ کړي وژاړینه)
۱۳۹۲حمل ۱۲مه چانډیګړ- هندوستان
هارون
Follow